أماني سعيد محفوظ تكتب: صندوق الدُنيا

أماني سعيد محفوظ تكتب: صندوق الدُنيا

مقالي بالدستور الأصلي.

أماني سعيد محفوظ تكتب: يا اللي كنت

أماني سعيد محفوظ تكتب: يا اللي كنت

إلي صديقتي...

إعترضت إحدي الصديقات علي الفكرة وقالت لي دي مش الفكرة السايدة في الجواز ..
ده صحيح ..الجواز فل وورد وياسمين وكل حاجة بس فيه ناس بتشوه قبل ما تحسبها ..ياتري اللي حطلع"...."تستاهل بوزي الغبي اللي بطلعهولها طول النهار والليل حتي وانا نايم بسبب ومن غير سبب..
عزيزتي عزيزي أنا أعرف واحدة جوزها "ده لما كان جوزها"كان بيقوم يطلع "....." برضه لأنه حَلم حِلم وحِش معجبهوش ولازم اليوم يبقي نيله علي دماغها ودماغ العيال الغلابة طبعا..
وأعرف واحد مراته اللي للأسف "لسه مراته" بتنزل تتسكع مع صحباتها اللي شبهها علي الكافيهات تشيش ..وتظبط دماغها وتظبط اللي يجي ف سكتها والغلبان بينضف ويساوي البيت ويذاكر للعيال علي ما ترجع الهانم..
بلاش نقول عليه مش راجل لأنه لسه بيصدقها لما تقوله رايحة لماما أو دكتور الودان أوحزور صاحبتي في المستشفي ولأنها مبتقولش هيه رايحة فين وهوه بيخاف علي عياله من المرمطة مع الشغالات أو عند الجيران لو نفذت تهديدها وراحت بيت أهلها إذا بس فتح بؤه واشتكي من كتر خروجاتها..
الدنيا مليانة يا صديقتي..والتجارب الزفت كتير..خلينا نشوف شويه منها لعل الناس تتعظ وتخللي عندها دم وتشوف في النهاية مصير العيال إييييييييه....

زفاف الشر

أتمني يكون عجبك ذوقي بعد اما مشيت
وجَبرتني اني انسي حقوقي..وانا برضة رضيت
عجبتك الفازة المقلوبة من غير أزهار
عجبتك العلبة المليانة رمل واحجار

شُفت الوردة اللي نشف عودها دبلانة ازاي؟
والفنجان المكسور طبقة مع أبريق شاي؟

شُفت الأوضتين اللي اتهجروا من غير أولاد؟؟
واللعب الباقية المكسورة..
ياما طلبم منك تصليحها والوقت اهو فات

شفت البرواز اللي اتكسَّر يوم لما مشيت؟
والتاني اللي سهرت اشتغله علشان البيت؟

لمحت سريري اللي انا سبته ودموعي عليه
وسؤالي اللي انا سبته ف حضنك
"مرتاح علي إيه؟"

سامع صوت الحيطة بتسأل راحو فين الناس؟
وسؤال الواد والبت عليك..
شُفت الإحساس؟

اللطمة الي انا خدي أخدها
والورقة البيضا اللي مفادها
إني اتحررت..
حفضل أقرا واردد فيها زي الأذكار
وافتكر اللي سمعتك قولته ليل ويّا نهار

مش حزعل من نفسي والومها..
ماانا ياما صَبرت
وحجيب جومه وامسح بيها إذا مرة ذَكرت

وامحي الأفكار اللي انا ممكن أضحك فيها
أو أبكي كمان

أنا عشت وشوفت اللي أنا شوفته
ف البعد زمان
وخلاص مبقاش عندي مساحه
تقبل أحزان
والأبيض والإسود فيها
حيكون ألوان

وحَلّم شَتات مشتملاتي واحطها ف ملف
الجرح اللي عَصَرته بإيدك منزفش وخَف
والحِمل اللي انا شيلته لوحدي زال عني وخَف

خُد بيتي وسنوات أحلامي وروح بيها بعيد
خُد بيتي وحُطام أيامي واعمل بيها عيد
عيد يشهد يوم لما بريتك قدام الناس

وشهودك كانوا هما جنودك ف زفاف الشر
حطولك رجلك شوف علي إيه قبل ما تتغر

إرجع بعد الغيبة اتمشى ف ارجاء البيت
والجملة دي رددها ف سرك
"يا ابو زيد ما غزيت"
بحييك

كشف حساب

إستحملني وخد بقي مني.. ورقه وفيها كشف حساب
عن كل سنيني اللي قضيتها.. ف كدب وغش وموت وعذاب

أيوه انا مت..
معاك انا مت
يوم ما عرفت إني عليك هنت
عشت وكنت كأنك طيب
ولا يوم بعت ولا يوم خنت

وبكل سذاجه انا صدقتك
وانت مكنتش غير كداب
إديتني مرايه اشوف بيها.. نفسي عجوزة وناقصة شباب

جوه مرايتك عشت حياتي وانا محبوسه جوه سكاتي

إتغيرت؟
آه اتغيرت
م انا بعمايلك دي اتأثرت
ويوم ما حاولت ألوم وأعاتب.. ب اللي انا قلته انت استهترت

اديتك كل اللي ف قلبي
وليه فيّه انت استخسرت؟
كل لحظة حب اديتها..م النهاردة انا بيها كفرت

لاعندى لوم ولا عندي عتاب
أنا بديلك كشف حساب
عن عمر انا عيشته معاك حاضرة
وف ورقك مكتوبه غياب

ضمير الغايب

علي خَلق الله كنت تِعَايب وتقول ده فلان راجل خايب
سافر وبِعد ووراه سايب..
أهله وبيته
طب انت يا جوزي اسم الله عليك إسمك موجود وسط عيالك
إيه بقي حالك؟
آكل شارب قايم نايم
علي طول مُفرد..
ولغيت مع نفسك حالة الجمع..
وعَميت عينك..
عن كل الدمع اللي بكيته أنا وعيالك
ع الحال اللي ف بيتنا بنيته
علي أب مفضل لَذاته وحُبه لِذاته عن فَلَذاته
علي زوج ضيّع عُمر مراته بمعاملة أساسها ف عضلاته
علي رب كيان لو جُم جنبه يسِم بَدنهم
وتمللي بيلّعن أيامهم
ومضيّع عمره وشبابه عنهم نافر
وياريت كان هوه اللي مسافر..
ولايتسمي عليهم حاضر بضمير غايب
قال ويعايب...